「全港戲院日」強勢回歸！全港所有52間商業戲院於4⽉25⽇，所有場次任何放映格式同影院類型，戲票都劃一票價$30，市⺠可以超值優惠享受唔同觀影體驗。
戲票4⽉22⽇ (星期三) 中午12點起，於各⼤戲院票房同售票網⾴公開發售，詳情請留意各⼤院線公佈。
全港戲院日由香港戲院商會主辦，文化體育及旅遊局轄下文創產業發展處以及電影發展基金資助，戲院商會理事長 袁彥⽂ 指「戲院日」係電影文化盛事，更係全城受惠嘅「多贏方案」，2025年舉辦時吸引約19.5萬人次入場，有效帶動戲院同周邊商場、餐飲以及零售商戶生意。鼓勵市民外出消費，成功連結戲院、商戶同市民，為本地經濟同社區帶來實質益處。戲院日更係一個享受共聚時光嘅節目，有助凝聚社區氛圍、傳遞正面訊息。 
文化體育及旅遊局文創產業發展處文創產業專員 黎細明 喺啟動禮就認為，「全港戲院日」成功令更多市民接觸電影，培養觀影文化，過去三屆活動吸引逾60萬人次觀影，反應熱烈。而今年首季已有本地電影突破億元票房，復活節檔期票房亦較去年同期倍增。政府期望升勢持續，亦呼籲市民4月25日踴躍入場支持香港電影。
廖子妤 擔任今年戲院日活動大使，Fish憑真摯細膩演技同獨特氣質獲觀眾喜愛，亦一直積極支持香港電影發展。Fish指戲院對佢而言意義非凡，唔只係睇戲嘅地方，更係佢踏上演員之路嘅起點，亦係透過唔同角色與觀眾分享故事嘅空間，希望透過「全港戲院日」令大家都多啲入戲院，愛上戲院文化，享受大銀幕獨有的震撼與氛圍，感受電影的力量。
