容祖兒 （Joey）、關智斌 （Kenny）及 霍汶希 （Mani）呢日現身一個揭幕禮，為嚟緊所屬唱片公司家族騷造勢，講到 張敬軒 日前突然取消關注多位圈中好友一事，祖兒話呢排冇乜聯絡，覺得軒仔見慣世面好有經驗同智慧，所有嘢可以自己消化到。
Kenny叫大家唔使太認真喺follow上，社交媒體只係一個平台，Kenny同軒仔有聯繫，好相信對方有足夠嘅智慧去消化自己所有情緒，作為朋友願意給予更多空間，Kenny又指取消關注前冇特登講。
經理人Mani就話軒仔係好正面，一直好關心年輕人，又熱心參加教育局同勞工署活動幫助青少年搵工等，Mani覺得軒仔係好義不容辭去幫助、鼓勵同協助一啲青少年，今次亦係一件好正面嘅事，Mani唔排除嚟緊陸續有藝人加入類似職位。
下個月舉行嘅家族騷準備得如火如荼，音樂總監王雙駿（Carl）突然辭任，祖兒話未受事件影響，Kenny認為今次牽涉單位太多，過程上喺溝通方面唔清晰，雖然今次合作唔到，不過佢知Carl喺前期已幫忙打好音樂根基，目前大家好團結咁做好個騷！