黃翠如同洪永城相隔七年再拍檔，出埠拍攝全新旅遊節目《走過歷史大地》，對兩位嚟講拍旅遊節目駕輕就熟，一啲難度都冇，最難嘅地方應該係要離開屋企嘅小朋友成個月，喺機場出發嗰陣，已經話好唔捨得蕭哈哈同兩個Sirface喇！
話咁快翠如同Tony已經到達第一站，翠如對蕭哈哈嘅思念之情亦開始大爆發，見佢同老公阿仔face time嗰陣扁晒嘴嘅樣，真係好唔捨得，阿蕭喺太太嘅post留言「原來一日二十四小時係咁長」，翠如回覆老公「原來一日二十四小時係咁長」，再加上六個喊晒樣嘅emoji，完全代表晒翠如嘅心情。
翠如咁大犧牲相信一定會有回報，事關佢同Tony對上一次合作主持旅遊節目已經係2019年嘅《出走澳洲》，時隔七年，兩位分別榮升父母，雖然兩家人關係好好，不時都聚會，不過觀眾最想見到嘅一定係呢對黃金拍檔再次出走拍節目，為咗廣大嘅觀眾朋友帶嚟歡樂，蕭哈哈同兩位Sirface唯有忍耐吓！
