近日網上瘋傳台灣男神許光漢同韓國人氣女團Twice嘅成員周子瑜戀愛ing，事關子瑜媽媽喺社交平台post出同許光漢嘅合照，於是大批網民開始自行腦補，話光漢同子瑜已進展到「見家長」嘅程度，光漢呢日出席活動就親自澄清呢單烏龍緋聞。
光漢話自己係收到子瑜公司嘅邀請去欣賞Twice台北演唱會，先會同子瑜媽咪合照，自己同子瑜僅止於喺演唱會後台打招呼嘅關係，並冇私交，對於傳出烏龍緋聞，光漢似乎唔多在意，「網路不都這樣，網路上的流言大家不要亂相信」。
如果有仔細睇子瑜媽咪嘅post就會知道，光漢係子瑜媽咪嘅偶像，愛女開騷，但子瑜媽咪post嘅第一張相竟然唔係寶貝女子瑜，而係自己同光漢嘅合照，唔少網民搞笑留言話子瑜地位不如光漢，子瑜媽咪亦大方回覆「我的偶像當然要放在第一張」。
