出道16年嘅譚永浩入行之後多數做主持，參演過唔少劇集，好少人知道佢係參加歌唱比賽入行，簽約唱片公司後因遲遲等唔到出唱片機會，於是同唱片公司解約，之後加入藝員訓練班，逐漸放低歌手夢。 
上年譚永浩有機會以鹿七伯身分蒙面參與《中年好聲音4》，重新燃起佢嘅歌手夢，於是佢打鐵趁熱推出首支派台歌《光》，首歌描述嘅正正就係佢追求歌手夢呢種永不放棄嘅精神。
myTV SUPER重溫《中年好聲音4》鹿七伯唱喉
譚永浩同何廣沛係同期藝訓班同學，一路互相扶持，譚永浩大方承認因好友發展好過自己，甚至連粉絲都被廣沛搶走，曾經有過妒忌之心，不過二人堅定友誼戰勝一切，至今仍維持好兄弟情誼。 
譚永浩因參演舞台劇《我們的青春日誌》認識女友杜小喬，二人性格互補，譚永浩話自己係女友面前完全冇嘢可以隱瞞，無論諗咩都俾女友一眼睇穿，二人已拍拖七年感情穩定，譚永浩亦承認有結婚計劃，等自己準備好就會畀女友一個承諾。 