許志安近日忙於為新歌《信天翁》宣傳造勢，老婆鄭秀文（Sammi）就喺吉隆坡舉行演唱會，呢次Sammi去大馬成個團隊二百幾人，有四十幾個dancers浩浩蕩蕩出發，不惜工本，當佢喺chitchat環節聽到現場觀眾詢問「安仔呢」，Sammi立即甜絲絲回應！
Sammi相隔10年再去馬來西亞開演唱會，台下觀眾大讚Sammi「好靚」，Sammi笑言自己保養得宜，「靚」係事實唔使多提。有觀眾大嗌「安仔」，Sammi甜笑回應：「安仔冇嚟，今日有事做。有show呀，你係咪都戥佢高興呀？我都好開心，安仔加油呀！我又喺度加油，佢唔得閒，我好舒服，我自己獨佔一個舞台。」
Sammi祝福現場觀眾能夠喺人生裡面搵到不可取替、而且好珍惜，可走好長好遠嘅伴侶，Sammi話：「人生之中搵到個不可取替嘅人，係好幸福嘅事！」跟住唱出《唯獨你是不可取替》，呢首歌一直被視為安仔與Sammi感情嘅經典主題曲，隔空放閃。
安仔有老婆支持，相信係佢最大動力，安仔噚晚（17日）喺灣仔出席仁濟醫院一個晚宴活動獻唱，安仔今晚將現身TVB流行音樂節目《J Music》，展示唱功實力之餘，仲會同樂迷更深入講音樂故事。
《J Music》周六晚9點半翡翠台播映
