劉德華 呢日出席一個慈善馬拉松活動，望落精神奕奕，不過提到日前證實前藝人 潘宏彬 離世消息，同對方係同期藝訓班同學嘅華仔，講起呢位昔日好友嘅死訊時坦言一早知情：「我知呀，係過年前嘅事，都一段時間喇。」華仔表示兩人已多年冇見面，進一步詢問潘宏彬嘅身後事時，華仔就不欲多談。
講返呢個慈善活動，華仔日前同小朋友一齊拍攝歌曲嘅MV，平時又靚仔又有型嘅華仔，喺小朋友面前竟然唔小心出醜：「我拍拍吓跣低，諗住同小朋友玩，估唔到自己咁唔小心，不過啲細路仔好懂事，全部都當睇唔到。」其實出唔出醜都係其次，華仔冇受傷先係最緊要。
計下時間，華仔對上一次喺香港開騷已經係兩年前，都係時候要計劃下。呢日佢就透露已經入紙申請紅館檔期，應該呢一、兩個月就會有結果，大家要靜候佳音喇！
