第14年擔任法國五月藝術節大使嘅 林嘉欣 ，呢日出席記招並分享佢之前去巴黎羅浮宮博物館參觀蒙娜麗莎展覽嘅感受，嘉欣話可以近距離兼無視線遮擋下欣賞鉅作，唔單止令佢大開眼界，仲令佢覺得好感動。
醉心藝術嘅嘉欣，近年沉浸喺鑽研陶藝創作，日前佢更喺台灣再次舉行陶藝個展，嘉欣都覺得過足癮：「做咗170件，總之我一休息，不停偷時間去做，係一個好好嘅成績。」嘉欣表示呢次係用柴燒，唔能夠預測作品嘅效果，所以係幾大挑戰。至於會唔會喺香港舉行展覽？佢話今年就應該唔會，明年會再視乎情況。
受嘉欣嘅影響，佢兩個女對視藝方面都各有天份，不過，嘉欣就話唔打算公開阿女嘅作品，事關佢話阿女正值青春期，好驚踩中佢哋地雷，佢話試過喺阿女嘅社交平台比Emoji，就即刻被阿女block咗，令嘉欣都大惑不解，所以佢話而家盡量都少講嘢。
