警匪系列電影前傳新作即將於5月1號登場，新片舉行「潘氏家族陣型預告啟動禮」，導演同戲中「商界」核心代表 謝君豪 吳慷仁 廖子妤 同 陳家樂一齊現身，活動又連環首播兩支家族預告，同發佈電影「正式海報」，以史無前例嘅超龐大陣容為呢場回歸前夕嘅權力風暴點燃戰火。
最大焦點一定係首度曝光嘅潘氏家族預告「父子情仇」同「家族內鬥」，預告中可見一直致力為家族洗底、引領集團重回正軌嘅首富當家潘雋亨(謝君豪 飾)，面對龐大野心嘅長子潘志昂(吳慷仁 飾)，謝君豪氣急敗壞怒斥吳慷仁「畜生不如」，更狠狠出手掌摑，父子徹底決裂戲碼張力十足。
至於「家族內鬥」預告就揭開風暴嘅導火線——潘雋亨最疼愛嘅十妹潘怡心(廖子妤 飾)，其夫兼環貿集團主席黃嘉輝(陳家樂 飾)慘遭綁架。謝君豪為解決綁架案周旋於商界同警界高層之間，更霸氣怒斥：「你知唔知道當家要做咩？主持公道，解決問題，同埋解決製造問題嘅人。」道破潘雋亨喺權衡家族利益冋親人性命嘅狠辣同決斷。吳慷仁、廖子妤同陳家樂三人間千絲萬縷嘅恩怨情仇，令呢宗綁架案更為撲朔迷離。
