鍾嘉欣嘅生日限定演唱會」，星期六晚喺佛山舉行，雖然Linda今次已非首次於當地開騷，但全場依然座無虛席。呢晚作為生日限定場，更特別設置延伸舞台同觀眾近距離互動，更驚喜邀請 張柏芝 同 曾比特 擔任嘉賓。
嘉欣指2026年演唱會頭炮揀選佛山舉行有特別原因：「上年第一次喺佛山演唱好好反應，所以今年都揀呢個地方作起點，今次場館有7千人，第一次挑戰咁多觀眾，事前已好期待，加上佛山呢個地方好有人情味、生活節奏又舒服，仲有好多美食，雙皮奶真係好好食。」
呢次演出唔止服裝上煥然一新，歌單亦新增6首歌曲，又加插勁歌熱舞環節；不過講到全晚最驚喜，就一定係重量級嘉賓張柏芝同曾比特嘅出現喇，嘉欣話：「兩位嘉賓都係我非常想合作嘅，我喺社交平台睇過曾比特演出，佢把聲好靚，好欣賞佢，我好好奇佢把攣髮係咪真，一見到佢就想親手摸下；而我2013年喺香港開演唱會已經邀請過柏芝，不過佢檔期唔得，我一直都想再邀請佢，今年再嘗試搵佢，一口就答應，仲話只要佢個期得，啲工作調前調後，佢都會100%支持，我聽到佢咁講，覺得好感動同窩心。」
原來嘉欣入行初期就已透過朋友認識柏芝，認為柏芝係一位大姐姐：「以前當我遇到難題時，我會請教佢，佢都會畀意見我，今時今日再見，呢個大姐姐嘅感覺，仲加咗一種好媽媽嘅親切，作為一個媽媽，佢係我學習對象。」
呢晚嘉欣同柏芝合唱《目的地》同《任何天氣》：「《任何天氣》係我有私心，我希望柏芝可以唱呢首歌畀我聽，因為呢首歌內裡歌詞好有正能量。」至於同曾比特就合唱黎明金曲《夏日傾情》，佢仲笑指同Mike合唱搵返初戀感覺。
而4月9嘅生日嘅嘉欣，被問到點慶祝時話：「生日喺香港簡簡單單咁過，好多朋友約我慶祝，但因為今次個唱，自己想閉關練舞同練歌，唔想食咁多蛋糕，因為要Keep Fit。」
