一個集合大灣區參賽者嘅歌唱比賽將於下月中舉行總決賽，主辦單位星期日舉行記者會宣佈細節，又公開入圍最後8強嘅名單，參賽者們更率先於台上接受鬥氣考驗。
彭家麗 應邀擔任其中一位評判，仲提到自己最重視參賽者臨場表現，而之前嘅兩日選拔中，可見參賽者嘅實力不俗，認為勢均力敵。佢提醒參賽者要有充足睡眠同休息，以免影響比賽表現。
Angela話：「我覺得評審準則公正最重要，試過為一啲歌唱比賽做評判，明明俾某位參賽者最高分，但最後結果大有出入，對造馬比賽我好反感。」年前曾為《中年好聲音》擔任過導師後，內地唔少比賽都邀請佢擔任評判。早於1994年開始教唱歌嘅佢弟子無數，到而家就要有相熟朋友介紹先會收學生，小心為上。
最近Anglea開設多地社交平台，仲見到唔少過往自己演出嘅劇集片段，令佢戲癮大發，希望有機會再拍劇。佢話：「以前同蝦叔關海山合作拍劇演父女，當時蝦叔同工作人員話很鍾意呢個女仔，仲叫大家多啲搵我拍劇。不過後來因為要專注唱歌，就減少演戲。」
Angela為追上時代，仲上堂學拍短片，更拍過一段3分鐘作品，邀請港台一位女主持同王祖藍嘅妹妹參與演出，作為自己首份功課，佢仲話有興趣繼續拍攝，但如果自己參與演出，就要搵人幫忙喇。
提到日前佢嘅手機通訊程式被黑客入侵，騙徒更透過佢電話發訊息向朋友借錢，Angela就話：「我即時通知身邊所有朋友，叫大家唔好中招。有位朋友仲已經轉帳咗一萬蚊俾我，好在騙徒攞唔到錢，唔係就中招喇。另一位朋友就冇過數，但將戶口號碼告知對方，我都有叫佢報警備案，好在最後身邊冇人有金錢損失。」