70歲米雪縱橫演藝圈55年，成為銀髮族仍然充滿活力，對工作認真投入，著重健康養生，最近演而優則唱，今年6月將舉行首個個人音樂演出，日前米雪接受製作人楊紹雄網上節目訪問，暢談其養生之道，對於尹志強（尹佬）離世十多年，米雪過住單身生活依然活得精彩。
米雪初出道時已好自律，一直謹記跟媽媽嘅承諾，就係保重身體等於孝順父母，譬如拍打戲唔好要阿媽去醫院探望，唔好撞車，對身體唔好嘅嘢，就算好鍾意食，米雪都決心戒食。
米雪雖然有凍齡美魔女之稱，之不過米雪認為自己係並唔靚，而係靠打扮同化妝，覺得最重要係「相由心生」，內心要開心，加上心態、食同運動都重要，所以米雪好感激周潤發帶領跑步，令佢晚年保持健康體魄。
米雪與男友尹佬相戀近26年，可惜男友於2010年因癌病離世，曾受訪回應與尹佬冥婚傳聞，對愛情抱隨緣態度，米雪多年一直過着單身生活。米雪去年70歲生日，未有跟親友大排筵席，一如以往咁低調度過，米雪話：「以前生日都喺同尹佬靜靜雞兩個人食吓餐飯，去到邊食到邊。」
被問咁多年點解唔搵個伴， 米雪坦言單身不代表孤單寂寞：「冇喎！拍戲係我副業，仲有好多瓣嘢，其實我係半個社工，係一個好好聆聽者，有人要訴苦，我就坐喺度聽，佢哋好鍾意同我講嘢，因為我係『拉鏈嘴』。」 米雪又指日常行程排得滿滿，時間都唔夠用， 米雪話一日有48小時就最好，笑稱最慘係助手，連助手都呻要辭職。
米雪坦言單身不代表寂寞，生活非常充實，坦言自己又冇家庭，朋友即興外遊，米雪成為「好腳」隨時得，加上佢朋友多，閒時跟朋友聚會，完全不愁寂寞！
