陳柏宇 今年7月將再一次於紅館舉行個唱，主辦單位日前舉行記者會宣佈細節，門票27號供信用於客戶優先訂票，30號早上10點起公開發售。
Jason宣布開show喜訊時，亦分享今次「Live in Frames」演唱會名字由來，佢以人生四格代表入行20年來嘅喜怒哀樂，演唱會上又同大家分享每一個重要時刻。Jason出道以來歌曲已逾150首，人生中不同階段，不論暗戀、失戀、曖昧、結婚生子，都總有一首歌陪伴左右。而Jason本人亦分享至今仍歷歷在目嘅難忘瞬間，佢話：「最難忘一定係第一次見唱片公司嘅人，當時喺卡啦OK房，心情係又開心又興奮又緊張，但嗰一刻同時亦斷定咗之後20年所發生嘅事。」
佢又認為〈逸後〉呢首歌意義非凡，雖然從未派台，但就因為樂迷熱愛而成為大家心目中經典。Jason更於記者會演繹新作〈過後〉，有如前作下集嘅新歌延續主人翁嘅故事發展。記者會上佢仲特別與三位幸運Fans大玩「我所聽見的未來」估歌名遊戲，雖然歌聲經過特別處理，不過歌迷都輕易估中答案，更獲得Jason贈送小禮物。
Jason宣布演唱會細節時，7月20號生日嘅佢，被問到係咪特別安排show後直接放假？佢就笑言：「放唔放假就睇大家，其實嗰個禮拜我都預備咗要開演唱會㗎喇。」現場歌迷聽到就興奮大叫要加場，同佢於紅館慶祝。
