鍾嘉欣 嘅佛山生日限定場演唱會日前圓滿結束，7千個座位座無虛席。為咗令歌迷有新鮮感，嘉欣喺服裝同歌單編排上都上花咗唔少心思，更加插勁歌熱舞。嘉欣話呢次除咗係生日場演唱會外，更係第一次挑戰7千人場館，佢亦感覺到大家都睇得好開心。
呢次嘉欣更揾嚟 張柏芝 擔任嘉賓，兩人合唱《任何天氣》、《目的地》。嘉欣話多年前喺香港開騷曾經邀請過柏芝，但當時因為對方檔期未能配合而未成事，呢次終於可以同台合唱，令佢覺得好興奮。
嘉欣分享雖然同柏芝一個喺電視圈、一個喺電影圈，但18年前因緣際會下令佢哋認識，當時已經覺得柏芝母性好強、好善良、好堅毅，自己非常鍾意柏芝。除咗柏芝之外， Mike曾比特 亦係嘉賓之一，兩人更合唱男女合唱版嘅《夏日傾情》有另一番味道。
一向感性嘅嘉欣，見到好多朋友嚟支持自己時，都忍唔住淚灑舞台，更一度泣不成聲。平伏情緒後，嘉欣好快又進入狀態，佢更邊唱《幸福歌》邊欣賞一段用AI製作成嘅成長片段。
