影帝 梁朝偉 最近為新戲馬不停蹄去到多個城市宣傳，最新一站就去到上海， 劉嘉玲 繼續夫唱婦隨陪伴在側。偉仔呢次喺戲中對白唔多，多數都係用眼神演戲，佢就話提早好多到德國嘅大學培養孤獨感，經常獨處，一個人發堀城市同小鎮。加上到德國冇耐就遇上新冠肺炎封城，一切停頓，人與人需要隔開，嗰陣好多時候都係自己一個人，孤獨感嚟得自然又被動。
偉仔喺戲中飾演神經科學家，為涉足從未接觸過嘅領域，偉仔都睇咗唔少書增值自己。不過佢就唔覺好難，反而覺得好好玩。被問走出角色未時，偉仔就話「未」，因為自己唔係一個科學人，而家反而會睇下科學類文章。 結束上海宣傳活動後，偉仔仲陪太太返鄉下蘇州探訪兒時舊友，兩公婆爭取時間寓工作於拍拖，非常Sweet！
