李家鼎前妻施明，原名方寶儀上月21日因肺炎病逝，終年74歲。由於鼎爺同施明嘅大仔泳漢喺媽咪臨終前，無通知爸爸同細佬泳豪，令兩人未能送前妻及媽咪最後一程。施明離世亦引發泳漢同鼎爺罵戰。泳漢指媽咪生前唔鍾意細新抱Agnes（泳豪太太），因為明言禁止弟婦入媽咪靈堂。
施明嘅喪禮今日（22日）喺大圍一間殯儀館舉行，靈堂佈置簡潔，遺照係一幅施明半側身嘅相片，橫匾寫上「轉生淨土」，遺照正中放置泳漢夫婦所送花圈，兩則分別放置鼎爺同泳豪嘅花圈，但泳豪所送的花圈上，其太太名字就疑被消失，而靈堂外寫上「私人聚會 非請勿進」，各界致送花圈則放滿靈堂內外。
喪禮前一日，鼎爺受訪時直指對大仔泳漢痛心「點解會養個咁嘅仔」，更指每月起碼畀五萬元以上養大仔一家，又以「人無三尺高，肚裏三把刀。」嚟形容大新抱Conny。鼎爺不滿大仔繼續生事，家屬花圈中拒落弟婦Agnes名字，令鼎爺無奈表示唯有做多個，但就講明自己唔會出席解穢酒。
對於爸爸嘅指責，泳漢隔空反擊，直指言論係衝佢而來，好明顯想幫Agnes洗白，等弟婦可以名正言順入靈堂。泳漢又強調自己結婚費用，唔係鼎爺所言由爸爸出錢。另外，佢強調爸爸所言非事實，佢當初喺私房菜打工，每月大約萬五蚊人工，都係由公司出。
