翁嘉穗 、 陳茵媺Aimee 同 莊子璇 三位港姐冠軍齊集慈善晚宴，身為全職媽咪嘅Aimee，近年都甚少出席活動，今次為咗支持善事，都暫時放低仔女。提到月尾就係囡囡嘅生日，Aimee自爆仍未準備，佢又指囡囡好鍾意籌備活動，會主動策劃所有嘢，而二仔同樣會咁做，不過會因應大家喜好而定，所以佢讚二仔將來會係絕世好男友。
Virginia嘅老公鄔友正同大仔都現身晚宴，一齊見證以限定女團WV嘅身份演出。Virginia解釋係受主席邀請一齊演出，之後佢提議不如跳唱演出，所以花咗三個月去準備，佢話老公都有睇過總綵排，有給予讚美。
忙緊《魔音女團》訓練嘅Hilary，呢晚都抽空參與行善，仲肩負重任擔任司儀，因為講稿好多，佢都有一定壓力，因為事前每日都要為《魔音女團》訓練，唯有抽瞓覺時間背司儀稿。
