資深藝人施明上月因肺炎離世，終年74歲。其家人於4月22日為施明設靈，翌日舉行大殮儀式。喪禮由長子李泳漢籌辦，並以閉門形式進行，靈堂外亦展示出「私人聚會 非請勿進」嘅告示。
靈堂佈置簡潔，遺照選用咗施明側身回眸一笑嘅照片，橫匾寫上「轉生淨土」。喺設靈前夕，李家爆出連串家庭糾紛，包括花圈署名風波，有指李泳漢拒絕於家庭花圈上加上弟婦Agnes嘅名字。
呢日所見，施明遺照前方放有六個花牌，最前方三個為李泳漢三個仔女送畀嫲嫲嘅心意，大孖李泳漢同太太所送嘅花牌，則放於遺照正前方，並寫上「寶貝媽 尊前慈母在 浪子不覺寒」，而左右兩邊則擺放住鼎爺李家鼎同細孖李泳豪以個人署名所送上嘅花牌。
不過李泳豪就表示，其實佢有送上一個與爸爸及太太Agnes三人聯合署名嘅花牌，但就被哥哥李泳漢擺放到靈堂後樓梯位置。
喺下午兩點四十分，一頭金髮嘅大孖李泳漢現身靈堂，佢企定後雙手合十予在場傳媒拍照，而佢嘅太太Conny就隨後由親友陪同下，與三名仔女步入靈堂。
之前李泳漢就表明拒絕細佬李泳豪嘅太太Agnes到場致祭，不過呢日豪仔仍與太太Agnes及鼎爺一同到場，身形消瘦咗唔少嘅鼎爺，睇落相當憔悴，對於現場有傳媒表示：「鼎爺你瘦咗好多」鼎爺亦有點頭以作回應。不過當三人行到靈堂門外，Agnes就被工作人員阻攔拒於門外，豪仔只好示意太太於門外等候，期間一直有多名工作人員監守住。
半小時後，Agnes向靈堂方向90度鞠躬後，就由親友陪同下離開，期間對於傳媒追問，Agnes未有作出回應。
同豪仔合作處境劇《愛・回家之開心速遞》嘅鍾志光亦有到場悼念，提到豪仔同哥哥李泳漢嘅風波，鍾仔就話自己只係喺靈堂內逗留較短嘅時間，期間未見兩人有交談。鍾仔指豪仔對媽媽施明相當好，憶述有次與豪仔一齊開工時，對方收到電話，估計係施明身體出問題，當時豪仔聽完電話後即眼泛淚光，但由於仍有一個shot未拍完，故豪仔只好待完成工作後才離開；至於講到豪仔太太Agnes，鍾仔亦大讚不已，指對方待豪仔身邊人亦相當有禮。
