修哥胡楓 呢日以一身閃爆閃石金西裝現身紅館個唱記招，呢次更係修哥以95歲高齡再踏紅館。修哥喺記招上，更以皇帝上朝嘅姿態坐上龍椅，完全代表佢喺演藝圈嘅至尊地位，而且今次演唱會，將會繼續挑戰修哥自己保持嘅「舉辦演唱會最年長華語藝人」健力士世界紀錄。
修哥呢次選擇喺日頭開騷，原因係因為有次得知有老友記散場後等車等到凌晨一點，令佢好過意唔去，準備以後開騷都喺日頭開，令老友記可以睇完返屋企食飯，唔駛搞到好夜。
修哥咁貼心嘅安排，完全係為咗一班老友記嘅生活作息，事關修哥係夜貓一族，佢仲話自己一般都係凌晨十二點左右先瞓，修哥又指自己都想早返少少休息，不過咁多年嚟都係夜貓，實在調較唔到。有時早瞓咗會突然醒，雖然可以瞓返，但都係夜瞓啲好。修哥仲話自己好爛瞓，每日都要瞓九個鐘，起身就會做簡單運動。
雖然修哥身體都好硬朗，不過佢就話因為已經年紀大，唔可以郁太多，所以演唱會上熱舞就未必有，但一定有娛樂性。被問會唔會有加場可能時，修哥幽默表示：「唔好喇啩，九十幾歲喇喎。」不過佢都話好期待加場，但唔知有冇體力。
