周殷廷YT 日前喺英國倫敦，被人野生捕獲佢疑似跟 陳凱詠Jace 拍拖，YT隨即喺社交平台公開一張從後箍實Jace嘅親蜜照，令人聯想佢哋係咪正式公開戀情。當大家想等佢哋進一步確認關係時，原來佢哋只係工作上嘅拍檔，Jace擔任YT新歌MV中嘅女主角，而YT亦因此被網民封為「Market廷」。
YT新歌遠赴英國取景，佢哋除咗街拍，亦有到公園、森林拍攝，YT笑說：「有很多人對我表示很喜歡《遲了悔改》、《意外現場》及《三生有幸》這類型的歌曲，但這些歌比較傷感，我曾想過是否延續三部曲，如果到第四部曲又如何，要繼續慘下去？我覺得人生其實未必是這樣，但是人生也未必所有事情都是開心的，我覺得人生就是充滿甜酸苦辣，所以很希望憑這首歌能呈現出來。」
新歌描述一對戀人抛下一切私奔，與自己愛嘅人去一個適合地方生活。YT嘅MV一向好少有美女相伴，但今次搵來Jace擔任女主角，佢就主動解釋因為同Jace相識多年，喺工作上合作無間，但係未試過出演情侶，佢相信合拍度一定有火花。
喺拍攝期間，佢哋發生好多趣事，喺森林拍攝一場戲，係YT孭住Jace喺森林中跑來跑去，但係當時YT被Jace掩著雙眼，令YT盲中中四圍走，嚇得Jace驚青捉實YT大叫；「我會死，你唔好撞跌呀，你跌到我就跌落地。」 一如以往，MV由YT自導自演，所以佢不時導演上身教戲，聰明嘅Jace一點即明，二人好快投入戲中，YT笑言「自導自演一腳踢雖然係有啲攰，不過佢好清楚自己要拍嘅內容，而且佢與Jace默契很好，反而覺得比較輕鬆。」
