李家鼎前妻施明於4月22日設靈，翌日舉行大殮儀式，朝早10點幾，施明靈柩由職員推出靈堂後，大孖李泳漢手持媽媽遺照率先步出，細孖李泳豪緊隨其後，兩兄弟自家庭風波後，首次一同見傳媒，二人不發一言，鼎爺由親友扶住喺另一邊步出，黃夏蕙連續兩日前嚟致哀。
大孖李泳漢與細孖李泳豪伴隨靈車離開殯儀館，施明靈柩奉移富山火化場火化，鼎爺、黃夏蕙及周潤發胞姊周聰玲等陸續到達，送施明最後一程，約10點半左右，儀式完成後，大孖李泳漢步出跨過火盆，而身體虛弱嘅鼎爺由細孖攙扶離場，細孖雙眼紅腫難掩傷感。
反觀大孖李泳漢比較冷靜，被問網民批評佢唔允許弟婦入靈堂鞠躬此舉不近人情，李泳漢堅稱呢個係媽媽施明嘅意思，要堅守媽媽最後嘅尊嚴。問到刻意請保安攔截弟婦，做法會唔會太強硬，李泳漢續道：「呢個唔係強硬，係好正常手段，人哋話要闖入嚟。」李泳漢亦唔回應細孖同弟婦一同送嘅花牌點解被放喺垃圾站附近。
鼎爺同細孖因截唔到的士，最後坐親友專車離開，而鼎爺表示身體抱恙未能開聲，唔能夠接受訪問。大孖李泳漢於尖沙咀一間酒樓安排解穢酒 ，鼎爺同細孖未有出席，大孖獨自受訪指自己邀請咗，佢哋唔嚟都冇辦法，被問佢同爸爸及細佬喺靈堂有冇溝通，大孖話：「細佬有走去同我啲仔女玩，阿爺都有同我講一、兩句說話……我由頭到尾只不過話呢件事係細佬出席，冇認嗰個唔出得席，就係咁簡單，我係被人鬧嗰個，我做緊要做嘅嘢，辦好我媽媽嘅後事，我沒做錯任何事。」
大孖李泳漢堅稱爸爸係被人控制，問到喪禮所有費用係咪爸爸負責時，大孖話自己畀，佢哋一毫子都冇畀，大孖又指一定會關心爸爸，至於兄弟決裂能否修補，大孖表示要視乎細佬意願，同時再次表示拒絕弟婦入靈堂，係堅守施明意願，當被質疑「遵母遺願」呢個講法，大孖怒問：「你焫我呀！」大孖強調弟婦與施明合照係細佬拍拖初期影嘅，指弟婦想搞散頭家。
被問施明離世前有冇講過想見鼎爺同細佬，大孖話自己都見唔到阿媽最後一面，係好突然好突然，稱自己因處理太多事情，要以母親最好情況下處理，唔需要擔心同爭議先向爸爸及弟弟通知施明死訊，又指曾多次邀請父親同住，鼎爺選擇要自己住，大孖話啱啱冇咗個阿媽，唔想冇咗個爸爸，會覺得好孤獨。
