今個星期繼續由 王鎮泉 Jeoffrey 為觀眾送上電影資訊，DC喺22年收穫好多好評嘅《蝙蝠俠》自從宣布會有續集之後，除咗Robert Pattinson確定回歸外，好多角色都已經定好，唯獨是Harvey Dent，即係雙面人嘅爸爸Christopher Dent一直未搵到合適人選，而偏偏呢個經常對兒子施暴嘅角色對於雙面人黎講絕對係影響好深遠。
據消息指，本身電影公司搵過好多一線男星參演呢個角色，好似Robert De Niro、Brad Pitt、Daniel Craig同埋Liam Neeson等等，不過全部都拒絕咗，最後搵到權力遊戲男星Charles Dance，而且聽講成數仲非常高，大家就好好期待。
金像名導史提芬史匹堡最近公開自己一部全新科幻電影作品Disclosure Day之外，亦都喺台上對電影同行發出一啲忠告，首先佢就話希望片商可以延長電影上畫嘅時間，咁樣先可以同觀眾有足夠嘅時間建立聯繫。佢又話而家實在太多IP嘅拍攝，如果過分依賴拍攝續集或者IP系列的話，成個電影產業將會無晒創意同動力，所以希望電影商可以多啲投資原創故事。
本周電影新片速遞
《米高積遜》：聚焦Michael Jackson嘅音樂成就，更深入描寫佢舞台之外嘅人生軌跡：由幼年被發掘成為Jackson Five主唱，到成為全球最偉大娛樂巨星嘅過程，展露咗佢無與倫比嘅創作熱情，以及對完美嘅執著追求。佢早期獨唱事業中嘅多個經典表演同重要時刻，亦會喺電影中復刻眼前，令觀眾彷彿親臨現場，以全新視角走進呢位傳奇人物嘅內心世界。
«LE SSERAFIM VR CONCERT: INVITATION》：韓國女子天團Le Sserafim嘅全新VR 演唱會，當觀眾戴上VR裝置，立即就可以有如置身現場甚至係喺台上睇show嘅真實體驗，同LE SSERAFIM置身同一空間。現實同幻想交織，見證擁有壓倒性能量嘅LE SSERAFIM，呈現全新維度的VR演唱會。
本周票房龍虎榜，截至4月22日中午，第1位《夜王》、第2位《我們不是什麼》、第3位《超級瑪利歐銀河大電影》。
