音樂遊戲節目《唱錢》，呢日又有兩位歌手 小肥 同 黃淑蔓 嚟到挑戰，佢哋嘅歌唱實力就有目共睹，三位主持 Eric Kwok、森美 同 李茵彤Desta 就相當期待佢哋可以為觀眾爭取到更多獎金呀！
myTV SUPER重溫《唱錢》精彩內容
Eric Kwok話黃淑蔓唔上嚟《唱錢》挑戰，都唔知佢係咁勁，森美就話平時聽黃淑蔓唱歌都覺得好聽同清新，但估唔到佢原來咁有實力。至於講到另一位挑戰者小肥，森美就話對方一向唱歌都好好，但因為近期小肥唱高音多，所以有啲擔心佢挑戰時都會慣性唱高咗，而Eric Kwok就預告喺咁多關挑戰中，其中有一首係小肥自己嘅歌，佢就提小肥唔好失守呀。
知道要挑戰返自己嘅歌，小肥就有啲擔心，仲話如果衰喺自己歌手上，係咪要執包袱返鄉下，佢又話上得《唱錢》呢個台，自己就將過往嘅舞台經驗抹晒，當成打機咁去過關。而被主持們大讚嘅黃淑蔓，就話自己本身係易緊張嘅人，而家嘅淡定都係演技呀！