《重案解密》改編自香港多宗轟動一時嘅真實奇案，以懸疑犯罪為題材嘅電視劇，近日喺網上熱播。早前有洪永城兇殘殺妻，搞到Inez瞓ICU，最近嗰集單元劇就由張國強、張文慈聯手呈現「教授殺妻案」！
《重案解密》教授殺妻案 直接前往myTV SUPER (YOUKU專區)
張國強一向係好戲之人，因一場逼真保鮮膜封屍戲份，引起網民熱話，網民讚張國強係透明包裝綑膜嘅高手，打包膜速度拍得住專業快遞員，劇組早前喺社交平台上載幕後花絮，查實張國強咁快手完成，係怕親身上陣嘅張文慈出意外，可見張國強為咗劇情效果之外，亦好照顧同場演員。
張文慈飾演患嚴重躁鬱症嘅妻子，被張國強用保鮮膜由腳開始包到上頭，一層一層往上纏繞，見張文慈頭部遭完全密封，被勒到面目全非，喺缺氧狀態下堅持演出，當聽到導演嗌cut，張國強迅速幫忙拆開，讓張文慈唞唞氣，為咗呈現完美視覺效果，呢場戲份要進行多次補拍，張文慈照樣瞓身演出，工作態度非常專業。
張文慈喺社交平台分享拍攝感受，坦言好耐冇演呢類角色，「過吓戲癮爽呀」，張文慈曾受訪講起呢場「保鮮膜」戲，佢心有餘悸，指搭檔張國強同劇組好擔心佢嘅安全，盡量錫住佢嚟拍，佢仲話今次遺憾未能跟飾演警察嘅三哥苗僑偉有對手戲，自己喺劇中大部分時間要扮演「屍體」或處於遇害嘅狀態，同場都冇任何交流。