《中年好聲音4》嘅戰場愈來愈激烈，今個星期20強選手會進入「快慢二重奏」挑戰，呢集佢哋會以慢歌上場合唱，除咗鬥歌藝之外，更發揮埋演技去配合舞台演出，每隊都強強聯手，戰況精彩。
myTV SUPER重溫激烈戰況
莫家淦KeithMok同雷小雷雙雙以馬甲服上陣，裝扮雖然一致，但睇落就有啲似侍應生，連佢哋都自娛一吓，莫家淦表示懷舊又有型一定諗起80至90年時代嘅譚詠麟AlanTam同張國榮LeslieCheung，有日搵到譚校長一張相，著住馬甲打條粗呔，覺得好靚仔，於是佢同小雷就各自去搵呢款衣著，點知著咗出嚟就幾似侍應生。
吳亦偉同蔡宓婕喺節目中一直表現亮眼，無論聲線同默契都好合拍，亦可能佢哋識得太耐有關，吳亦偉竟然喺節目上不自覺爆料拍檔脾氣大，之後仲越爆越多，互相傷害，場面搞笑。另外一眾選手好似卓䣭燕、尤淑情、陳旭培、范子睿等均發揮出唔錯嘅水準。