羅家英、汪明荃聯同一眾粵劇老倌現身發佈會，家英哥為慶祝80歲，將於下月一口氣演出五套粵劇，家英哥致詞時亦不失一貫幽默態度，佢喺台上笑言80歲似乎離大去不遠，不過快極仲有三十年。
五套劇目中，家英哥先後以文武生同反串演出，挑戰性相當大，阿姐都話要捧足咁多場，又叮囑老公要照顧好身體，英哥就自爆每晚凌晨兩點瞓覺，翌日中午十二點先起身。
踏入80歲，家英哥仍賣力為粵劇作出貢獻，嚟梗仲會角逐八和主席，佢希望以自身對粵劇界嘅經驗，令八和重回正軌。阿姐坦言擔心家英哥身體，因為競選活動已經繁忙，若果當選就有更多公務要處理。
