全新節目《魔音女團》即將喺5月4號晚10點半首播，由16位TVB女藝人組成嘅女團練習生呢日著起型格女團制服，為節目拍攝《Lucky Star》MV。一眾練習生嘅舞姿魅力十足，跳起舞都有板有眼，十足十韓國女團一樣！
雖然拍攝當日先係佢哋第一次16個一齊跳，但葉靖儀就話經過兩個星期嘅日對夜對，大家已經有一定默契！雖然大家係專業藝人，但以女團練習生身份拍MV都係第一次，倪樂琳笑言被咁多鏡頭對住真係好有壓力，更因為太投入練舞而不慎手指插眼受傷。而莊子璇、宋宛穎透露，舞蹈老師喺初期對大家好嚴格，評語相當銳利，仲同大家講以呢個水平係冇辦法喺韓國做到練習生。
一眾女團練習生們喺造型上亦有所改變，最大轉變嘅就一定係Carmen拋開乖乖女形象，以一頭金髮Look示人，呢個突破令Carmen又開心又緊張。至於王汛文、邢慧敏嘅造型就行型格路線，Sharon更捨棄留咗好多年嘅長頭髮，以短髮造型示人！
咁多位練習生日日練舞，身形變得更加苗條之外亦各有成長，俞可程就被喬美莎形容由唔識跳舞，變成專業舞者，廖慧儀仲話佢係「最佳進步女團員」添！
魔音女團十六位練習生名單如下：
宋宛穎、倪樂琳、莊子璇、俞可程、鄧凱文、王汛文、喬美莎、穎喬、李尹嫣、邢慧敏、廖慧儀、蔡華英、陳熙蕊、葉靖儀、倪嘉雯、盧映彤
