吳彥祖專程返港聯同導演梁樂民為新戲宣傳，今次係Daniel相隔六年再接拍港產片，佢話初時會擔心唔習慣，不過第一日試造型時，見到熟悉嘅團隊就好快投入，加上以廣東話演出，有種回家感覺。Daniel又好開心同年青演員合作，佢笑言以前自己喺片場年紀最細，之後就有人話睇佢嘅戲大，到而家就話父母鍾意睇佢嘅戲。
Daniel一直好想同導演合作，當收到邀請時就一口答應，而導演話大家好掛住Daniel，今次Daniel出演嘅角色係警務處副處長，而Daniel正正配合呢個需要有年齡同歷練嘅角色。
工作以外，Daniel非常享受身為人父嘅身份，當佢提及囡囡以巴西柔術成功箍佢頸經歷，即時流露慈父嘅笑容。佢又透露囡囡有參加學校話劇團，不過自己就唔主張囡囡入行，因為當演員好辛苦。
