TVB熱播劇《正義女神》即將踏入結局周，言官(佘詩曼飾)嘅心魔正式浮出檯面，原來佢一直因為將胡宇澤(黃梓曜飾)嘅死誤判為意外，放走高成彬，導致之後連串不幸事件而耿耿於懷。
劇情講到言官喺庭上暈低入院，夢中重回胡宇澤墮樓地點，見到成身血嘅胡宇澤搵佢報仇。劇情播出後，睇到觀眾好心悒，飾演胡宇澤嘅小童星Wesley就喺社交平台分享拍攝呢場戲嘅感受。
Wesley話因為自己得三句對白，原本諗住好易做，可以好快收工，估唔到NG咗幾次，「Roll機後嘅言官瞬間認真，對於我講對白嘅語氣同速度都有要求，教Wesley夢境出現嘅胡宇澤，唔需要太大表情太惡，但又唔可以無語氣好似唸對白，要用眼神去表達你嘅嬲怒」，Wesley又大讚阿佘好識同小朋友相處，主動撩佢傾偈，仲同佢一齊扮鬼，完全冇架子。
隨住劇集進入尾聲，阿佘亦有感而發，佢喺社交平台講到拍攝呢套劇嘅初衷，「透過唔同嘅單元，唔同嘅案件同人物關係，希望各位青少年、家長們同老師都有所領悟，繼而改善彼此嘅關係」，佢又話好開心呢排出街有好多人叫佢「言官」，希望《正義女神》最後一個星期大家可以繼續捧場。
