劉松仁近年不時傳其健康出問題，早兩年有報道話佢疑似中風，講嘢口齒不清，行路需要柺杖。松哥於2024年為音樂劇《利瑪竇》擔任藝術總監，接受TVB娛樂新聞台專訪時就透露自己坦然面對生老病死，態度豁達。
今年情人節松哥同《名媛望族》演員開心聚會，睇上去精神奕奕，令大家放心。松哥近兩年雖然少有公開露面，但佢不時會更新社交平台，大部分內容係回憶自己嘅舊作。近日松哥就喺社交平台上傳同老拍檔米雪聚會相，松哥睇落好精神，笑容滿面，身旁嘅米雪素顏戴眼鏡，同樣笑得好開心，松哥寫到「昨天與紅顏知己飲茶聊天～一樂也，收獲友情，是我一生最大的得著。」
松哥同米雪合作多達十幾次，絕對係香港影視圈最經典嘅CP之一，松哥之前分享過二人合作嘅作品，均係無數觀眾心目中嘅經典。松哥同米雪喺幕前合作無間，幕後亦維持超過50年嘅珍貴友情，大批粉絲紛紛許願，希望嚟緊六月米雪入行55年紀念騷，可以見到呢對黃金拍檔喺台上再合作。
