有「野獸男團」之稱嘅韓國男團2PM成員玉澤演，24號喺首爾新羅酒店舉辦婚禮，迎娶交往10年嘅圈外女友，2PM其餘五位成員全部到齊為澤演送上祝福。
雖然婚禮低調唔對外公開，但就被入住新羅酒店嘅內地遊客由房間窗口直擊婚宴現場，並且影相post上網，婚禮內部相火速喺各大社交平台流傳，網友紛紛大讚一對新人郎才女貌。
由該名網友post嘅照片中見到，澤演著住黑色燕尾服，新娘身著白紗加長頭紗、手捧花球，一對新人並肩企喺花園中接受親友祝福。據韓媒報道稱2PM成員Jun. K、Nichkhun、祐榮、俊昊喺婚禮上合體獻唱祝歌。
已婚成員燦盛就擔任婚禮主持，據知成員揀咗2PM嘅出道曲《10分滿分中的10分》作為婚禮祝歌，別具意義，由於澤演過往受訪曾經講過希望由2PM成員擔任婚禮歌手，一班好兄弟當然出席撐場啦！
