TVB全新綜藝節目《夫妻肺片》以婚姻關係為主題，呢日進行開鏡拜神，由蕭正楠EdwinSiu、曹永廉、吳若希JinnyNg、車婉婉Stephanie Che做主持兼任婚姻求生教練，阿蕭同阿廉唔使講都知求生意志強，加埋做嘉賓嘅廿四孝老公馬國明KennethMa，簡直係老公天花板嘅組合。
阿蕭同阿廉兩兄弟高度讚揚馬明係絕世好老公，好得過火，笑言若果做唔到好似馬明咁樣就係衰，馬明又爆阿廉平日又煮飯俾老婆食，成份糧都俾晒老婆，同阿蕭一唱一和話TVB其實好多好男人，呼籲單身女性可以喺TVB搵老公。
阿廉搞笑話TVB成份人工俾晒老婆都唔係好多，身邊嘅阿蕭同馬明立即起哄指自己冇咁講，又話公司養起佢哋全家，食TVB嘅飯，佢哋都All in TVB，搞到阿廉即刻尷尬補鑊。阿蕭同馬明同樣喺公司結識老婆黃翠如PriscillaWong同湯洛雯RoxanneTong，阿廉追擊二人話佢哋喺公司又食又拎，阿蕭大膽回敬阿廉：「你估你唔想呀？拎唔到唧。」場面爆笑。
一向敢言嘅Jinny同婉婉同樣係人妻同媽媽，對於婚姻關係佢哋都有好多睇法，揚言會自帶故事喺節目中分享，Jinny覺得女人特別了解女人，同啲嘉賓坐埋傾偈時，就發覺人妻會引發好多共鳴。
節目每集搵嚟明星戰友，好似譚俊彥ShaunTam、陳敏之SharonChan、連詩雅ShigaLin、梁諾妍InezLeong、湯盈盈AngelaTong、森美SammyLeung等，一齊拆解夫妻日常炸彈，分享咗夫妻日常，輔助大家繼續走向恩愛之路。
