講起韓國收視女王，金高銀一定榜上有名，由佢主演改編自人氣漫畫嘅劇集來到第三季，金高銀飾演嘅柔美亦將迎來全新嘅戀情，同新生代大勢男演員金載原譜出相差十年嘅姊弟戀，為咗令二人外表睇上去合襯啲，金高銀呢位姐姐花咗唔少功夫，佢搞笑話自己好認真去皮膚科保養。
金載原就話自己喺拍攝過程完全冇感覺到10歲嘅年齡差，大讚金高銀係一個漂亮又認真嘅姐姐，仲成日請食飯，一輪嘴稱讚，搞到金高銀好怕醜呀！ 喺全新一季中，柔美嘅細胞會繼續上演各種內心小劇場，戲份同前兩季一樣超級多，對體力都係一大考驗，不過金高銀就話劇情好可愛，拍攝現場充滿歡笑聲，所以自己都好樂在其中。 