小豬羅志祥早前被傳喺家中猝死，消息一出震驚娛樂圈。不過小豬經理人即刻闢謠，小豬隨後抵達上海出席活動，喺機場手拎寫有「4月15日上海接機」嘅A4紙力證自己未死，又拍片反問到底係邊個製造謠言，幽默得嚟亦回應得相當大方。
日前小豬現身台灣一個活動時公開談論「死訊」，得啖笑之餘，佢仲話自己睇過該位網民發布嘅文章，唔少藝人已經被寫死過，自己已經「死過兩次」。傳言一出時，自己同朋友打緊波，亦收到藝人朋友傳嚟關心訊息，令佢無奈：「如果你相信這個新聞，你覺得我會回你訊息嗎？」
至於罹患失智症嘅羅媽媽有冇睇到相關傳聞？小豬發揮搞笑本色講地獄笑話，反問記者「你覺得她會記得嗎」，不過佢解釋係因為母子倆感情相當好，先會開呢個玩笑。
小豬6月就會嚟到香港開Show，呢段時間佢都忙於排練，佢更透露今年會推出三首新歌，行程主要以開演唱會為主。近日有唔少人都許願，希望佢可以喺新一輯內地男藝人唱跳綜藝節目現身，小豬都話有機會嘅話，自己都唔拒絕。