方力申自從舊年底升呢做爸爸後，佢嘅社交平台幾乎被阿女方愛嘉(Isla)霸佔晒，小方更被網民封為「寵女狂魔」，咁又難怪嘅，話晒阿女係小方嘅前世情人，加上咁乖咁萌，真係分分秒秒都被佢融化呀。
日前小方就上載咗一段喺床上同囡囡傾計耍樂嘅片段，見囡囡不時摸住小方嘅面頰，開心到笑逐顏開，兩父女温馨指數爆晒燈！之後小方又上載咗幾張同阿女嘅合照，相中所見，阿女依偎住喺小方身上，仲用小手抱住爸爸嘅面頰，所以小方點會唔冧呀？而另一張就見阿女親吻爸爸嘅鼻頭，仲笑到見牙唔見眼，難怪小方冧滋滋留言話：「咁嗲得唔得㗎？」
阿女唔單止融化小方嘅心，唔少網民都被小愛嘉嘅萌樣迷倒，有網民留言表示：「感覺你成個人改變咗」、「方小姐係嗲豬，巧可愛」、「甜到漏」，連陳敏之都忍唔住問小方：「咁樣點出門口?」，睇嚟同樣係阿媽嘅敏之，都好明白阿女咁可愛又咁嗲，真係唔捨得出門口返工，而小方就回應敏之一句「 I Know」。
下個月將會喺紅館舉行演唱會嘅小方，呢排的確要忙住籌備個唱，但幾忙都好，小方都依然會抽時間陪阿女玩，仲有網民敲碗要求小方演唱會上帶埋阿女上台表演。
