有「億萬駙馬」之稱嘅伍富橋(Alvin)，喺2002年迎聚富家千金梁兆楹(Shirley)，婚後一直非常恩愛，而下個月更係兩人嘅結婚四周年。近日Shirley喺網上分享貴價化妝品時，竟然被眼利嘅網民發現佢所用嘅產品，係專為孕婦預防妊娠紋而設，因而有傳Shirley同Alvin好事近。
原本打算結婚四周年當日先公布喜訊嘅Alvin，意外地被網民踢爆即將榮升做新手爸爸嘅消息，佢只好大方向傳媒承認，並表示太太已懷有四個多月身孕，一切進度理想。之後佢更喺社交平台「官宣」，並上載同太太極具創意嘅合照。
相中所見，Alvin同Shirley着上特別訂製嘅T-shirt合照，Alvin件衫寫住「Nonsense!She’s just pregnant」(不要亂說，她只是懷孕了)，而Shirley嗰件就寫住「I Quit Drinking」(我戒酒了)，睇嚟Shirley為咗bb，已經戒咗飲酒。而另一張相，就係佢家中三隻愛犬化身大哥哥，畫簿上仲寫住「How to be BIG Brother 101」，並貼上一張bb超聲波照片，果然每張相都好有心思。
Alvin留言表示：「最近接咗單大工程，預計10月完工，到時見啦，伍梁液」，原來兩位新手父母，仲結合咗自己嘅姓氏，幫bb改咗「伍梁液」嘅乳名，真係非常幽默。
