走過歷史大地丨黃翠如孖洪永城重遊英國 躲櫥窗抵寒風足跡走遍整個倫敦

黃翠如同洪永城早前啟程前往歐洲拍攝全新旅遊節目《走過歷史大地》，繼羅馬站之後，佢哋就展開英國倫敦站行程，兩人亦係相隔13年後再同遊倫敦，此行勾起唔少回憶。

兩人足跡遊遍倫敦著名景點，包括聖詹姆士公園、沃爾瑟姆斯托泵房博物館、聖保羅大教堂等，又冒住七度寒風喺泰晤士河取景，當佢哋拍攝貝爾法斯特戰艦前，兩人凍到要匿喺紀念品店櫥窗避風，同行嘅攝影師全程短袖衫上陣，跟兩人相映成趣。除咗遊覽景點，兩人又到訪當地最悠久歷史嘅波羅市集，又品嚐不同美食，兼且學做當地傳統行業做點燈人。