謝賢（四哥）係1960年代成為香港粵語片及電視圈嘅超級當紅小生，以英俊瀟灑形象紅極一時，超過60年嘅演藝生涯，謝賢經歷過兩段婚姻，與甄珍離婚後，跟狄波拉育有霆鋒及婷婷，之後遇上比佢年輕49歲女友Coco，二人拍拖12年，於2018年分手後，Coco近日轉戰內地社交平台，不時分享跟四哥嘅昔日舊情，網民轟Coco消費前度。
謝賢與Coco當年拍拖12年，曾供對方留學，凡事照顧周到，交往最後三年更係「有愛無性」，Coco於33歲嗰年渴望生小朋友，四哥唔願浪費對方青春決定分手，曾傳豪擲2,000萬港幣作補償，Coco最近喺內地社交網先爆謝霆鋒結婚冇向佢敬茶，又爆四哥借謝婷婷珠寶追女仔，又大談初邂逅經過等。
Coco稱2004年與四哥喺上海初相識，被四哥風度吸引，翌日四哥邀約午餐，Coco坦言施展欲擒故縱，明明冇約人，卻扮唔得閒大玩心理戰，四哥食完飯要求Coco送佢去機場，當時佢身穿一件羊絨大衣，四哥叫佢可以伸手入其皮褸取暖，Coco輕輕地將手放喺四哥膊頭上，感覺到四哥心跳好快，Coco續言：「就知道這個男人是100%喜歡我了，一見鍾情。 」Coco隨後獲四哥邀請嚟港，由司機接送去酒店，房內早已準備好禮服，字條寫「My dear Coco 此珠寶需歸還，珠寶是我女兒的，裙子是我為你選的」。
Coco當年心目中嘅男神係方中信，記得有次跟四哥去打波偶遇方中信，Coco聲稱四哥當面「示威」，四哥講：「你知道嗎？我女朋友很喜歡你。後來她跟了我之後，她就不喜歡你，我是不是比你帥？」 方中信尷尬承認：「大哥，你永遠是全香港最帥。」 