草蜢入行40周年演唱會開鑼，眾多圈中好友關之琳、顧紀筠、張智霖、袁詠儀等都有嚟支持。除咗草蜢嘅精彩演出之外，頭場邀請到陳奕迅踩台，佢仲同三子一齊跳唱兼爆料，令全場氣氛火熱。
Eason嚟到點只唱歌吖，佢當然要展示自己嘅「吹神」本色，講吓自己同草蜢三子淵源，當佢講到同蘇志威時，Eason就話因為對方搶咗佢嘅劉小慧，所以有段時間嬲咗對方，喺電視城碰面時，Eason仲專登同蔡一傑及蔡一智打招呼，但就唔理蘇志威。蘇志威笑言知道Eason當年睡房入面貼咗小慧嘅海報，不過自己唔會介意，因為當年佢同小慧男未婚女未嫁。
傑仔病癒後越戰越勇，見佢舉手投足，邊唱邊跳都狀態依然，席間佢更同歌迷剖白對抗腦癌嘅心路歷程，鼓勵同路人積極面對，幸好現時傑仔已經冇咩大礙，情況穩定，佢話現時唔使做任何治療，只需要觀察住就得，自己繼續行山遊水做運動。
草蜢能夠喺圈中屹立40年，除咗自己嘅實力了得，佢哋亦不忘初衷，完成演出最想多謝嘅係已故恩師 梅艷芳。相信若果梅姐見到佢哋嘅演出，一定為佢哋開心。
