全新綜藝《夫妻肺片》探討婚姻議題，四位主持 車婉婉 吳若希 蕭正楠 同 曹永廉 化身「五星級求生教練」，教大家如何為緊張嘅夫妻關係拆彈。呢日節目錄影，幾位男嘉賓包括 陳展鵬 周志康 麥長青 同 單立文 都係圈中出名嘅愛妻號。展鵬同太太 單文柔 成日公開放閃，兩公婆咁恩愛，原來同寶貝女都有好大關係，佢形容小豬比係夫妻間嘅潤滑劑，帶動家中氣氛。
阿康近期忙於《中聲4》比賽，可以一路過關斬將，太太嘅支持絕對功不可沒。阿康指參賽初時太太忙於照顧小朋友，到賽事中段時，太太就同小朋友嚟捧場，佢話有家人在場，有時會唱得更投入，又會怕失控喊，阿康覺得每次錄影休息時，能夠跟太太傾偈，同小朋友擁抱，係一種好好嘅力量。
麥包麥長青同豹哥單立文雖然都係住家好男人，但就係完全相反嘅類型，麥包話對家講「我愛你」係毫不吝嗇，豹哥話豹嫂返咗上海，若果返屋企對空氣講，不如直接對住鏡頭講「我愛你」。不過「我愛你」三隻字真係唔係人人受落，好似Jinny嘅老公就應該驚多過喜，因為Jinny試過傳「我愛你」短訊畀老公，點知老公即時打畀佢，問佢發生咩事。
蕭正楠大方承認每日至少講十次「我愛你」，太太黃翠如最近遠赴歐洲拍攝節目《走過歷史大地》，前後將會分開近一個月，佢話未試過分開咁耐，都會掛住太太。
