恭喜恭喜！阿Sa蔡卓妍4月28號喺IG公布喜訊再婚，嫁細9年嘅健身教練Elvis林俊賢，阿Sa上載二人嘅婚紗相，仲大方對住鏡頭騷出婚戒。阿Sa寫到「恭喜我嫁你，恭喜你娶我，以後請多多指教，多謝大家嘅祝福」。
阿Sa上年11月傳出同細9年嘅健身教練秘密拍拖，今年一月阿Sa出席活動大方認愛，今年農曆新年，阿Sa同男友同大班朋友一齊歐遊，阿Sa仲開心同傳媒分享媽咪罕有地對另一半好滿意，身邊嘅好朋友對阿Sa嘅新戀情非常祝福。阿Sa喜訊一公布，大批好朋友包括關智斌、方力申、馮德倫等紛紛第一時間送上祝福。
阿Sa經理人Mani霍汶希表示當日所有最愛佢嘅人、最close嘅摯愛親朋喺現場見證，Mani都睇住阿Sa出嫁，Mani話其他唔方便透露，「多謝大家嘅祝福，阿Sa一直都被好多人疼愛，亦都會越嚟越幸福」。
阿Sa經理人Mani霍汶希亦喺微博寫長文，分享開心嫁女嘅心情，「眨吓眼，從當初那個笑眼彎彎、臉圓圓的小女孩，到如今溫柔通透、從容淡定的你，我們之間早已是更親近的家人。其實咁多年來我腦海一直幻想這一幕的出現，希望能夠親身見證這個時刻，當日的我感受到現場每一個人都被你們的愛深深感動了。你終於遇見一個真心愛你、你亦真心愛著的人，是一個能令你開心、令你笑得燦爛、過得自在舒心的人。幸運地，一直以來身邊都有很多愛你的人，如今再多一位，能夠一生陪伴在你身邊、好好照顧你、哄你開心、永遠寵著你的人，老母我真的老懷安慰了。看著你踏入人生新階段，真心為你感到歡喜，新的旅程，新的身份，願往後我們的SaSa都被愛意包裏，既有愛人在側的安穩，也有自在做自己的灑脫，擁有最幸福的模樣。」
