第28屆上海國際電影節將於6月舉行，28號大會官宣梁朝偉將擔任今屆上海國際電影節金爵獎評委會主席，大會除咗曝光梁朝偉嘅官方相，仲有佢親筆手寫為大會送上嘅祝福。
而太太劉嘉玲亦第一時間轉發上海國際電影節官方微博，寫下「辛苦」兩個字。 大會形容梁朝偉係華語影壇最具代表與國際影響力嘅演員之一，偉仔從影超過40年，演出作品過百部，喺中外影壇各大頒獎禮獲獎無數，作為評委會主席絕對游刃有餘。
偉仔近期忙於宣傳主演嘅西片《寂靜的朋友》，嘉玲姐亦愛相隨，陪老公周圍飛，兩公婆好懂生活情趣，寓工作於娛樂，好似去完上海宣傳，偉仔就特登陪太太返鄉下蘇州探望兒時故友。
眾所周知偉仔同嘉玲兩公婆熱愛滑雪，幾乎年年都去日本玩番轉，好多人曾經喺滑雪場野生捕獲佢哋，日前樂隊LMF鼓手KB就喺社交平台post出同偉仔喺滑雪場嘅合照，佢話其實已經唔係第一次喺滑雪場撞見偉仔，今次終於鼓起勇氣同偉仔合照，仲以「成就解鎖」來形容自己嘅興奮心情。
