謝寧呢日為一個理財活動擔任嘉賓，近年佢努力創建嘅生意有聲有色，所以佢從未諗過要放棄做女強人，至今62歲都不言休，佢亦好著重未來嘅退休生活，關注規劃人生下半場。
謝寧話主要係心態上嘅轉變，喺生活方面自由度更加大，而自己嘅目標就係希望餅舖分店可以開到全世界，為香港品牌爭光。喺活動上雖然被公開女人嘅秘密年齡，但謝寧大方表示一啲都唔介意，反而覺得身心健康最緊要：「雖然我已經登六，但無論我自己嘅心態、樣貌，我覺得都未必似。」謝寧仲話對自己嘅年紀好驕傲，因為睇落一啲都唔似。
好快就到母親節，謝寧屋企已經四代同堂福氣滿滿，仲話因為屋企從小嘅培養，令佢哋一家人keep住融洽嘅關係：「我哋屋企分得好清楚，所有大時大節，一定屋企人行先，生日一定要同阿媽食飯先，因為阿媽大晒。」謝寧就唔會要求囡囡送禮，最緊要有心。
