集合十大影帝級陣容嘅警匪系列電影《寒戰》最新一部《寒戰1994》，呢日舉行全球記者會及首映禮，周潤發、郭富城、梁家輝、吳彥祖，謝君豪、劉俊謙等頂級陣容強勢登場，發哥親自舉機同一眾演員及傳媒朋友玩自拍，場面真係好歡樂。
等咗十年呢部系列電影終於強勢回歸，見到戲中老中青演員同場聚首，發哥特別感觸，仲話希望自己可以演到100歲，經常跑步維持身體健康，佢仲搞笑叫梁家輝快啲戒酒，先有機會一齊拍到100歲。發哥亦鼓勵一眾後輩，指拍戲好辛苦，但係肯俾心機就一定得。
今次戲中有多個角色有年輕版，惟城城飾演嘅「劉傑輝」係冇年輕版，城城表示呢個角色早已埋藏喺心入面，佢亦勾起當年接到呢個角色時，有啲半信半疑，尤其知道要同梁家輝做對手戲，更加覺得不可思議。
吳彥祖十年後再次參演港產片，為咗呢部戲除咗苦練對白之外，仲同劉俊謙有唔少對手戲，兩位雖然係首次合作，但係二人非常投緣，劉俊謙仲講笑話第一次見到吳彥祖嗰陣，竟然有衝動想咀埋落去，佢哋仲互讚對方靚仔，果然係賞心悅目。
吳彥祖呢排為咗宣傳新戲，要同住喺美國嘅家人分隔兩地，不過吳彥祖話佢個女反而好享受爸爸唔係屋企嘅日子，「因為我比較嚴肅啲，關於功課之類嘅嘢」，佢仲投訴阿女而家淨係攬媽咪唔攬自己，傷心到直頭想流眼淚。問到第日阿女拍拖點算，吳彥祖就話暫時唔敢想像，只希望阿女唔好遇到感情騙子。
記者會結束後，大會特意喺首映前舉行紅地氈環節，場面星光熠熠，包括壓軸登場嘅發哥同發嫂、郭富城就一身好有年代感嘅西裝出場，梁家輝、吳彥祖、謝君豪、劉俊謙、鄭則士、台灣演員吳慷仁、白只、魏浚笙、陳家樂、彭敬慈及英國演員Aidan Gillen等盛裝出席，出爐影后廖子妤同高海寧分別以大露背裝示人，而曾經參演系列電影嘅劉德華亦驚喜現身。
