恭喜恭喜！43歲阿Sa蔡卓妍喺4月28號宣布閃婚，同細佢九歲嘅健身教練林俊賢（Elvis）拉埋天窗，姊弟戀火速開花結果。兩人同步喺社交平公布消息，附上甜蜜婚照同婚戒向外分享喜悅。
相中見新郞哥同新娘子同樣笑得好幸福燦爛，默契地留言「恭喜你娶我，恭喜我嫁你」以及「恭喜我娶你，恭喜你嫁我」作標語。 震撼彈拋出之後，一對新人隨即獲得大批圈中好友送上祝福。阿Sa嘅拍檔兼閨蜜阿嬌鍾欣潼及好友關智斌（Kenny）都有向傳媒回應好友出嫁嘅喜訊。
阿嬌話好開心阿Sa係生活中搵到一個最佳拍檔，激動又感動，祝佢哋新婚快樂，白頭到老永結同心，快啲生個BB啦。 Kenny嘅健身教練就係阿Sa老公，相信佢早已見證一對新人愛情萌芽嘅過程，依家兩位好友開花結果，Kenny戥阿Sa進入人生新階段開心，仲話同阿Sa識咗廿幾年，一齊經歷過咁多高高低低，而家見到佢搵到一個可以令佢開懷大笑、俾到安全感佢嘅人，好感觸、好感動。
而最大感觸當然係一直視阿Sa親生女嘅經理人Mani霍汶希啦，佢話當日自己同阿Sa摯親好友都在場見證。Mani亦有喺社交平台發長文為阿Sa踏上新旅程同新嘅身份送上祝福。
其實舊年底阿Sa多次傳出同林俊賢拍拖消息，但未被證實，至11月阿Sa同C君一齊搞生日會時，真命天子終於正式曝光坐喺阿Sa身邊，當時阿Sa為保護愛情仍然低調處理，今年一月中，阿Sa忽然改口風仲叫傳媒可唔可以刪走緋聞兩個字嚟直認戀情中，大方認愛後更帶同男友一齊歐遊，農曆年後更分享媽媽對另一半感受，估唔到呢段愛情咁快就開花結果，再次祝福一對新人幸福快樂！