車婉婉一向都係廿四孝好媽媽，每逢阿仔BBQ考試，佢都會化身「伴讀奴婢」，陪阿仔並肩作戰打大佬。
不過日前婉婉就由「伴讀奴婢」搖身一變成為「追星」小粉絲，皆因BBQ參加咗學校一年一度嘅陸運會，而無得入場觀戰嘅婉婉，唯有走到運動場外，隔住個鐵絲網睇阿仔比賽，佢仲舉機偷拍阿仔比賽過程，而發現到媽媽嚟為自己打氣嘅BBQ，就派福利向鏡頭送上飛吻，呢次真係隔住個鐵絲網都feel到兩母子有幾sweet呀﹗
婉婉小迷妹仲係社交平台分享佢嘅追星感受：「是日…追星，一年一度Sports Day！小朋友都好投入、好開心、好叻叻呀﹗所有賽事完滿結束，恭喜所有得獎嘅小朋友。」婉婉驚訝BBQ原來都跑得幾快，佢話自己低估咗阿仔呀。
其實婉婉唔係第一次嚟運動場追星㗎喇，上年BBQ參加學校陸運會，婉婉一樣都有化身追星族，唔少網民見到婉婉咁瘋狂都大送心心，仲叫佢繼續陪伴孩子快樂長大。
