近日網上流出稱係內地節目《歌手2026》嘅參賽名單，當中更有一系列嘅嘉賓陣容海報，包括 鄭欣宜 、劉憲華、周興哲、劉惜君、張韶涵、曾奪7座格林美獎（Grammy Award）嘅美國創作歌手Christina Aguilera、美國當紅歌手Olivia Rodrigo等。
由於嘉賓陣容相當豪華，故海報一出即引起網民熱烈討論，不過《歌手2026》嘅官方帳號就喺26號發出澄清，指網上廣傳嘅海報均為網民創作嘅A.I.圖片：「在昨日《歌手》欄目組發布了大眾評審的招募資訊之後，網路上出現了許多《歌手2026》嘉賓陣容海報，這些海報均為網友自由創作，並非官方版本。謝謝大家的支持與關注。節目仍在緊張籌備，正式陣容尚未官宣，敬請期待！」
其實除咗以上陣容，網民仲製作咗Lady GaGa、孫燕姿、胡夏、竇靖童等A.I.海報，唔少網民都誤信為真。
