鄭俊弘 、 陳楨怡、 蔡思貝、 小肥、 濱口愛子、 伍允龍 與女友 李蔓瑩 等呢晚出席電影首映，而《魔音女團》嘅一眾練習生，都暫時放低訓練嚟睇戲放鬆下，節目將於5月4號播出，佢哋都話心情既期待又緊張。 宋宛穎 同 倪嘉雯 率先欣賞部份節目片段，宋宛穎笑倪嘉雯喺片段中有唔少發呆畫面，因為佢每當聽到要排練一連串舞蹈，就會思考究竟應唔應付得到。
倪嘉雯指訓練只係幾個禮拜，但重溫節目感覺好似經歷咗三年時間，因為大家嘅形象同感覺有好大分別。 盧映彤 就好期待節目出街，睇吓自己嘅改變。 喬美莎 指平日訓練密集，今次能夠一齊休息出席首映，感覺非常開心。
倪樂琳 覺得訓練後，令自己完全拋開港姐包袱，突破自我。俞可程自覺身手比以往更敏捷，零唱跳經驗嘅 邢慧敏 都話大家進步好大，預告節目最後時，大家會見到不一樣嘅女團，而 李尹嫣 自覺喺舞台嘅信心比以往更強。
蔡思貝早前到尼泊爾作慈善探訪，佢話此行最難忘嘅係，見到當地女仔面對逆境仍自強不息，即使受童婚問題影響人生，仍追求夢想求學。
