葉蒨文Sophie 成立粉絲後援會，第一次搞Fans Meeting，001號蘇菲貓頭號粉絲 GM曾展望，當然要嚟熱情應援啦！GM唔止人到，仲送咗一束大大嘅鮮花畀女友，又同大班蘇菲貓一齊拍片，搞到Sophie不知幾感動！原來Sophie前事係完全唔知有呢個環節，佢仲趁機讚GM好識製造驚喜。Sophie表示其實一路以嚟都無諗住成立Fans Club，但因為《女神配對計劃》嘅出現，令佢粉絲人數急增，佢亦好希望藉此做多啲慈善工作。
Sophie同大家玩遊戲送禮物，考驗下現場咁多蘇菲貓對自己嘅了解程度，不過點解冠軍唔係GM呢？GM解釋蘇菲貓們太厲害，佢都要甘拜下風，雖然只得第五名，但GM就覺得自己只係輸在手速慢。
蘇菲貓特別剪輯Sophie過去10年嘅作品，見證住佢一路嘅成長，Sophie都睇到眼濕濕，咁當然就要唱下自己首新歌《兌現永遠》回饋下大家啦！
