《中年好聲音4》快慢二重奏來到下半場，10組選手將進行快歌對決，上半場最高分嘅吳亦偉同蔡宓婕繼續帶來爆炸力十足嘅舞台演唱《煞科》，佢哋嘅對手范子睿同尹景順就以《頭髮亂了》對決，至於科亞高巴、許雲妮就以《活著VIVA》對陣莫家淦、雷小雷嘅《找自己》。
不過卓猷燕、尤淑情以及黎若雪、姚兵唔只比唱功，仲要比跳出Comfort zone嘅突破性。卓猷燕、尤淑情以Rock爆唱腔演唱《Are You Ready》，二人就話好享受磨合感覺，因為可以互相鼓勵同進步。黎若雪、姚兵嘅《愛情陷阱》就好有爆發力，姚兵笑言，跳舞同廣東話都唔係自己強項，不過今次都挑戰到，令佢感到好滿意。
選手中有幾位完全冇跳舞經驗，就好似鄭家聲、許美琪、可嵐、陳旭培。今次成就解鎖，亦令佢地對跳唱信心大增！許美琪就話，因為要Rock，所以要投入更多力量、動作要大啲，如果之後有更多複雜動作，佢都有信心駕馭到。陳旭培就話，佢喺唱《重口味》時有一個動作想扮型，點知就被朋友話好呆。
周志康同馬浩宜呢次就有親密演出，絕對會令人心跳加速，但二人壓力都唔少！皆因雙方嘅另一半都喺現場。阿康笑言自己耳仔已經被老婆拎甩三隻，好在癒合能力強，而浩宜老公就為老婆鼓掌以作回應。
